Von Sant Jacob Wer daz elend bauen wil der heb sich auff und sey mein gesell wol auff sandt jacobs strassen zwey par schuech, der darff er wol eyn schüssel bey der flaschen Eyn breiten huth den sol er han undt an mantel sol er nit gan myt leder wol besezet es schnei oder regen oder wehe der wint daß ihn die lufft nicht nezet Sack und stab ist auch dar bey er lug, das er gebeichtet sey gebeichtet und gebüsset kumpt er in die welschen landt er fint keynen teutschen briester Eyn teutschen priester findt er wol er weiss nit wo er sterben sol oder seyn leben lassen sterbt er in dem welschen landt man grabt in bey der Strassen. Szo ziehen wir durch schweizerlandt hin sie heyssen uns got wilekumen sin undt geben uns ir speise sie legen uns wol und decken uns warm die strassen thunt sie uns weysen Szo ziehen wir durch die welschen landt die sind uns brüdern unbekant das elend müssen wir bauen wir ruffen got und sandt jacob an undt unser liebe frauen Szo ziehen wir durch der armen jecken landt man gibt uns nichts dan aeppfeltranck die berge müssen wir steigen gib man uns aepfel und pirn genuck wir essens für die feigen Szo ziehen wir durch Sofeyen hineyn man gibt weder brodt noch weyn die Seck stehen uns gar lere wo eyn bruder zu dem andern kompt der saggt im böse mehre Szo ziehen wir zu sant spiritus ein Man gibt brod undt guten weyn wir leben in reichen schallen langedocken und hispanierlandt daz loben wir brüder allen Es liegen fünff berg im welschen landt die sein uns bilgram wolbekandt der erst heysst runzevale und welcher bruder darüber get sein backen werden im schmale Der eyne heysst de monte castein der pfortenberck mag wol sein bruder syn sie seyn einander vast gleiche und welcher bruder darüber gehet verdient das hymmelriche Der virdt heist der rabanel darüber lauffen die brüder und schwestern gar schnel der fünfte heist in alle fabe do leidt viel manches biedermans kyndt aus teutschem landt begraben Der könig von hispanien fürdt eyn kron er hat gebauet drey spital gar schon in sand jacobs eren und welcher bruder darin kompt man beweist ihm zucht und ere Es war dem spitalmeister nit eben fierd halbhundert brüdern hat er vergeben gott lass nit ungerochen zu burges ward er an eyn kreutz gehefft mit scharfen pfeilen durchstochen Der könig der war eyn biderman in bilgramkleider legt er sich an seyn spital wolt er beschauen was im die teutschen brüder sagten das wolt er nit glauben Da ging er in daz spital eyn rr hiesz im bringen brot und weyn die suppe die war nit reine spitalmeister lieber spitalmeister mein die brot sind vil zu kleine Der spitalmeister war eyn zorniger man der greulich hat dich herein gethan daz nympt mich nimmer wunder undt werstu nit eyn welscher man ich vergeb dir wie die teutschen hunde Undd da es an den abent kam die brüder wollten schlafen gahn der pilgram wollt schlafen alleine spitalmeister lieber spitalmeister meyn die pet sein nit gar reine Er gab dem pilgram eyn schlack daz er von herzen sehr erschrack er thet zu dem spital ausslauffen die andern brüder theten den spitalmeister ser rauffen Da es an den morgen kam man sach vil gewapender man zu dem spital eindringen man fingh den spitalmeister und al sein hausgesinde Man bandt in auff ein hohes ross man furt in gen purges auff das schloß man thet in in eyn eysen einschliessen es thet den spitalmeister gar sere undt hardt verdriessen Der spitalmeister het eyn tochterlein es mocht recht wol eyn schelkin seyn es nymmpt mich immer wunder das der liebste vater meyn sol sterben von wegen der teutschen hunde Es stund eyn bruder nahe darbey nun sol es nit verschwiegen sein ich wil es selber klagen d a ward daz selbig tochterlein unter dem galgen begraben Sy bruder du solt nit stiller stan XL meil hastu noch zu gan wol in sandt jacobs münster 14 meil hinunter paß zu eynem stern heist fynster Den fynstern stern wollen wir lan stan undt wollen zu salvator eyngan groß wunderzeichen anschauen so rufen wir got und sandt jacob an undt unsre liebe fraue Bey sant jacob vergiebt man peyn undt schuld der liebe got sy uns allen holt in seynem höchsten throne der sandt jacob dienen thut der lieb got sol ihm lonen vom Facsimile übertragen durch Martin Uhlig für die Richtigkeit keine Gewähr. Manche Schreibweisen wurden behutsam angepasst.